У Опалі з размахам прайшла «Гулянка ў фальварку»
Учора аграгарадок Опаль прымаў традыцыйнае свята «Опальскі фальварак». У гэты раз мерапрыемства ператварылася ў жывы экскурс у гісторыю, прысвечаны знакамітым ураджэнцам і дзеячам Янаўскага краю – ад Напалеона Орды і Фёдара Дастаеўскага да роду Скірмунтаў і Вішнявецкіх.
Праграма пад назвай «Гулянка ў фальварку» ўключала элементы рэканструкцыі. Гасцей чакалі вясёлыя гульні, конкурсы і майстар-класы па гісторыка-бытавых танцах. Музычны настрой стваралі запрошаныя калектывы з Драгічынскага і Маларыцкага раёнаў.
На працягу ўсяго свята працавалі гандлёвыя рады і выставы-продажы хатніх пачастункаў ад сельскіх Дамоў культуры раёна. Таксама ў ходзе мерапрыемства адбыўся міні-пленэр, дзе навучэнцы і педагогі дзіцячых школ мастацтваў стваралі карціны мясцовых краявідаў, якія ўручалі ўдзельнікам свята ў якасці памятных падарункаў.
Свята атрымалася яркім і душэўным. Поўны рэпартаж чытайце ў бліжэйшым нумары нашай газеты.
Валерый Міхальчук.